22.11.2018; https://armenpress.am/arm/news/955461.html

Կառավարությունը հավանություն տվեց ՀՀ 2018 թվականի պետական բյուջեով նախատեսված հատկացումների հաշվին աղետի գոտու բնակավայրերում երկրաշարժի հետևանքով անօթևան մնացած ընտանիքների բնակարանային ապահովման պետական աջակցության միջոցառումները:

Ինչպես փոխանցում է «Արմենպրես»-ը, աղետի գոտու բնակավայրերում երկրաշարժի հետևանքով անօթևան մնացած ընտանիքների բնակարանային խնդիրների լուծման նպատակով պետական աջակցու­թյամբ իրականացվող բնակարանային ապահովման ծրագրի շահառու ճանաչված ընտանիքների բնակարանային խնդիրների լուծման նպատակով «Երկրաշարժի հետևան­քով անօթևան մնացած ընտանիքների բնակարանային ապա­հովում» ծրագրի շրջանակում նախա­տես­ված 458 մլն 118 հազ դրամն ուղղվում է Լոռու մարզի գյուղական բնակավայրերում ծրագրի շահառու ճանաչված ընտանիքների համար Ծրագրի շրջանակում կառուցապատողի կողմից շինարարությունն սկսված՝ առավել բարձր պատրաստականության առնվազն 44 կիսակառույց բնակելի տան շինարարության ավարտմանը:

Քաղաքաշինության կոմիտեի նախագահ Ավետիք Էլոյանը նշեց, որ խնդիրը փոքր-ինչ  բարդ էր, և սկզբում խոսվում էր, որ գումարը տրվի բնակիչներին, իրենք ավարտեն շինարարությունը, սակայն ռիսկային է համարվել այս տարբերակը, և խնդրի լուծումն այլ կերպ են գտել:

Այսպիսով, Հայաստանի «Ֆուլեր» տնաշինական կենտրոն» բարեգործական հասարակական կազմակերպության հետ պայմանագիր են կնքել, որ նույն գումարի սահմաններում այդ կիսակառույցների շինարարական աշխատանքներն ավարտին հասցնեն: 

Ավետիք Էլոյանը նշեց, որ հետագայում ևս փորձելու են այդ ընկերության ծառայություներն օգտագործել: «Սխեման այսպիսին է՝ գումարը հատկացվում է մարզպետարանին, մարզպետարանը կնքում է պայմանագիր ընկերության հետ, որն էլ, իր հերթին, պայմանագիր է կնքում անհատական բնակիչների հետ… Սկզբում գումարի քսան տոկոսն է փոխանցվում, այնուհետև՝ 80 տոկոսը»,- ասաց նա:

Վարչապետի պաշտոնակատար Նիկոլ Փաշինյանը հետաքրքրվեց, թե արդյոք համոզվա՞ծ են, որ այս մեխանիզմով այդ տների շինարարությունն ավարտին է հասցվում, և ստացավ դրական պատասխան:

Ըստ նախագծի՝ աղետի գոտու բնակավայրերում երկրաշարժի հետևանքով անօթևան մնացած ընտանիքների բնակարանային խնդիրների լուծման նպատակով պետական աջակցությամբ իրականացվող բնակապահովման ծրագրի շրջանակում ՀՀ Շիրակի, Լոռու և Արագածոտնի մարզերի բնակավայրերում շահառու ճանաչված 5381 ընտանիքից 2008-2017 թվականներին հատկացված մոտ 65 մլրդ դրամ միջոցների հաշվին լուծվել է 4839 ընտանիքի բնակարանային խնդիր:

Արդյունքում դեռ լուծում է պահանջում ծրագրի շահառու ճանաչված 542 ընտանիքի բնակարանային խնդիր, որի համար պահանջվում է մոտ 4 մլրդ դրամ, խնդրի ամբողջական լուծումը կառավարության ծրագրով նախատեսված է մինչև 2020 թվականի վերջը:

ՀՀ 2018 թվականի պետական բյուջեով ծրագրի իրականացման համար հատկացվել է 460 մլն դրամ, որը նախատեսված է ուղղել Լոռու մարզի գյուղական բնակավայրերի՝ առավել բարձր պատրաստականության կիսակառույց բնակելի տներ ունեցող ընտանիքներին ուղղակի ֆինանսական աջակցության տրամադրմանը:

Նախագծով կարգավորված են նաև նախատեսված աշխատանքների կազմակերպման ընթացակարգի, պայմանների, հաշվետվողականության, ինչպես նաև արդեն ավարտված բնակելի տների նկատմամբ ծրագրի շահառուների իրավունքների գրանցման հետ կապված հարցերը:

Միաժամանակ ՀՀ անշարժ գույքի կադաստրի կոմիտեի կողմից առաջարկվել է նախատեսել դրույթներ կիսակառույցների, դրանց օրինականացման, ինչպես նաև օրինականացման համար նախատեսված վճարների վերաբերյալ, քանի որ դրանց մի մասն արդեն իսկ սեփականության իրավունքով գրանցված են Հայաստանի Հանրապետության անվամբ և «Գլենդել Հիլզ» փակ բաժնետիրական ընկերության կողմից ներկայացված տվյալների հիման վրա գրանցվել են որպես ինքնակամ շինություններ: