12.08.2016;
www.armradio.am/hy/2016/08/12/կառավարությունը-խոստանում-է՝-շինարա/

Հայաստանում այսօր նշվում է  Շինարարի օրը: Չնայած տնտեսական ճգնաժամի պայմաններում հայ շինարարները հիմնականում արտերկրում են իրենց հմտությունը կիրառում, սակայն քաղաքաշինության նախարար Նարեկ Սարգսյանն այսօր վստահեցրել է, որ  կառավարության հետ համատեղ իրականացվող  ծրագրերի  արդյունքում 2017-2018 թվականներին  բազում շինարարներ  կվերադառնան հայրենիք:

Շինարարությունը եղել և մնում է  մեր երկրի տնտեսության առանցքային բնագավառներից մեկը: Նորանկախ Հայաստանում հայ շինարարի շնորհիվ զարգացել են շինարարական տեխնոլոգիաները, որոնք էլ դարձել են  տարեց տարի վեր  խոյացող նորակառույցների ամրության գրավականը: Հայ վարպետ- շինարարի ձեռքով Հայաստանում վեր են հառնել բազում կոթողներ: Այսօր նշվում է հայ շինարարի մասնագիտական տոնը և կարևոր  այս մասնագիտությանը  լծված մարդկանց վերաբերյալ  հնչում են գնահատանքի խոսքեր ու հանձնվում պարգևներ:

2008 թվականի տնտեսական ճգնաժամի պայմաններում  շինարարության ծավալները, ըստ քաղաքաշինության  նախարար Նարեկ Սարգսյանի, զգալիորեն նվազել էին, ինչի  հետևանքով էլ  առաջ եկավ  շինարարների զբաղվածության խնդիրը: Սակայն այսօր, գերատեսչության ղեկավարը վստահեցնում է՝ ոլորտում անկում չի նկատվում: Ավելին, կառավարությունում իրականացվող  ծրագրերի արդյունքում կարճ ժամանակ անց Երևանում չեն լինի պարապուրդի մատնված վերամբարձ  կռունկներ:

Շինարարության ոլորտի զարգացման համար  կյանքի են կոչվել բազում ծրագրեր: Երկու տարի առաջ  քաղաքաշինության նախարարությունում ստեղծվել է կառուցապատման ներդրումային ծրագրերի վարչություն, որտեղ լուրջ մշակումներ են արվել:

Մյուս խնդիրը շինարարական ոլորտի օրենսդրության խնդիրն է: Այս ուղղությամբ ևս  աշխատանքներ  կատարվել են: Նարեկ Սարգսյանը վստահեցնում է՝ կատարվող  քայլերի արդյունքում 2017 թվականին շինարարության մեջ  կարձանագրենք աճ և բազմաթիվ շինարարներ կվերադառնան հայրենիք:

Հայաստանի շինարարների միության տնօրեն Գուրգեն Մինասյանը, ով այսօր արժանացավ քաղաքաշինության նախարարության Ոսկե մեդալի, իր հերթին նկատեց, որ շինարարական ծավալների նվազման արդյունքում շինարարական կազմակերպությունները կիսով չափ են ծանրաբեռնված, ինչն էլ հանգեցրել է  սոցիալական մի շարք խնդիրների։

Տարեց տարի Երևանում վեր են խոյանում նորակառույցներ։ Սպիտակի ավերիչ երկրաշարժից հետո շենքերի ամրությունը մնում է խիստ կարեւոր։ Նոր շենքերի  սեյսմիկ անվտանգությունը սեյսմակայուն շինարարության բնագավառի  մասնագետ Էդուարդ Խաչիյանը դրական է գնահատում։ Ի դեպ՝  Ճարտարապետության և շինարարության ոլորտում ներդրած նշանակալի ավանդի համար նա այսօր արժանացավ Երեւանի քաղաքապետարանի Ոսկե մեդալի: 1994 թվականից հետո  կառուցված  շենք- շինությունները, մասնագետի գնահատմամբ, բոլորն էլ սեյսմակայուն են: «Հարկավոր է շատ ուշադիր լինել հին շենքերի նկատմամբ: Կամ պետք է ուժեղացնել, կամ, եթե իրենց  ժամանակը անցել է, քանդեն և տեղը ավելի ամուր ու հուսալի շենքեր կառուցեն»,- ասում է։

Վերջերս ԱԺ-ն պատվո կոչում էր սահմանել նաև շինարարների համար։ Նարեկ Սարգսյանի խոսքով՝ մինչև սեպտեմբերի 21-ը կպարզվի անկախ Հայաստանի  առաջին վաստակավոր շինարարի անունը: