Սպիտակի երկրաշարժի 30-րդ տարելիցի կապակցությամբ Քաղաքաշինության կոմիտեի նախագահ Ավետիք Էլոյանի անունով նամակ է ստացվել ԱՊՀ անդամ պետությունների շինարարական գործունեության բնագավառում համագործակցության միջկառավարական խորհրդի Սեյսմակայուն շինարարության և տեխնոգեն հետևանքների նվազեցման հանձնաժողովի նախագահ Մ. Կլյաչկոյից:

Նամակում, մասնավորապես, ասվում է, որ Սպիտակի ողբերգությունը ոչ միայն անմար հիշատակ է, այլև մասնագիտական պատասխանատվություն՝ սեյսիկ ակտիվ գոտիներում տեղակայված բնակավայրերի կայուն անվտանգության համար: Ողբերգությունը, որի համար բոլորը ցավում են, դասեր է տվել, որոնք չպետք է մոռացվեն:

Կլյաչկոն նշում է, որ ժամանակակից կառույցների շինարարությունը, նոր շինարարական նյութերի և տեխնոլոգիաների ներդրումը, շահագործվող կառույցների սեյսմիկ ուժեղացումն ու անհրաժեշտ այլ դրույթներ՝ ճարտարապետաշինարարական պրոֆեսիոնալիզմի կարևոր և անհրաժեշտ տարրերն են: 

«Մենք հավատում ենք, որ հենց այսպիսի լավատեսական մոտեցումն է մեզ միավորում,  համատեղ ակտիվ գործունեությունը՝ ուրբանիզացված տարածքների անվտանգության նպատակներով»,- նշել է Սեյսմակայուն շինարարության և տեխնոգեն հետևանքների նվազեցման հանձնաժողովի նախագահը՝ Հայաստանի քաղաքաշինության կոմիտեի նախագահի հետ բեղմնավոր համագործակցության հույս հայտնելով: