Ճարտարապետության և քաղաքաշինության՝ Պրահայում անցկացվող ամենամյա փառատոնն արդեն ավանդույթ է դարձել:

Այս տարի «Ճարտարապետության շաբաթվա» միջոցառումներն անցկացվելու են «Ճարտարապետության 100 տարի» խորագրով:

Քաղաքաշինության կոմիտեի նախագահի խորհրդական Արմեն Մինասյանն ընդունել է «Ճարտարապետության շաբաթ» երևանյան փառատոնի տնօրեն Տաթևիկ Զաքարյանին:

Քննարկվել է Քաղաքաշինության կոմիտեի հետ համագործակցության հարցը, ինչպես նաև ներկայացվել փառատոնին Հայաստանի մասնակցության ընթացքն ու ներկայի մոտեցումները:

Արդեն վեց տարի է, ինչ մեր երկիրը մասնակցում է փառատոնին: Պրահայում Հայաստանն ունի իր տաղավարը, որտեղ իրենց նախագծերի մակետներն են ներկայացրել տարբեր կազմակերպություններ, ճարտարապետական արվեստանոցներ ՝ «Ստորակետ», «Արխկոոպ», «Ուրբանյունիթ» և այլն:

2018 թվականին Պրահայի «Ճարտարապետության շաբաթ» փառատոնին Հայաստանը ներկայացնելու է «Ստորակետ» ճարտարապետական արվեստանոցը՝ միջազգային ժյուրիի հավանությանն է արժանացել «Այբ» դպրոցի Գ մասնաշենքի նախագիծը:

Արդեն երեք տարի է, ինչ փառատոնն անցկացվում է նաև Հայաստանում:
2018-ը բացառություն չի լինելու՝ երևանյան փառատոնն անցկացվելու է նոյեմբերի 14- 24-ը: Փառատոնի շրջանակներում կազմակերպվելու են կինոդիտումներ, դասախոսություններ, սեմինարներ: