ՀՀ ԿԱ քաղաքաշինության պետական կոմիտեի կողմից մշակվել և ՀՀ կառավարության 2017 թվականի գործունեության միջոցառումների ծրագրի և գերակա խնդիրների ցանկում ներառվել է տարածական պլանավորման գործընթացը բարելավելու և մինչև 2021 թվականը Հայաստանի Հանրապետության համայնքները քաղաքաշինական ծրագրային փաստաթղթերով ապահովելու վերաբերյալ կետը:

Այս համատեքստում ներդրվել է միկրոռեգիոնալ մակարդակի՝ համակցված տարածական պլանավորման փաստաթղթերի մշակման գաղափարը:

Ըստ այդմ, փաստաթուղթը մշակվում է մեկից ավելի համայնքների համար՝ ներառելով երկու տարբեր մակարդակների՝ տարածքային հատակագծման նախագծի (ներառված համայնքների ընդհանուր տարածքի մասով) և համայնքների գլխավոր հատակագծերի ու գոտևորման նախագծերի դրույթներ:

Այս կերպ կարճ ժամկետներում հնարավոր կլինի բոլոր համայնքներն ապահովել տարածական պլանավորման փաստաթղթերով՝ միաժամանակ ապահովելով պետական, մարզային և համայնքային մարմինների միջև սերտ համագործակցությունը, խնդիրների և գիտելիքների փոխանակումը, ինչպես նաև՝ տարբեր մակարդակների փաստաթղթերի համատեղման շնորհիվ հնարավոր կլինի խնայել ֆինանսական միջոցները:

2017 թվականին արդեն իսկ մշակվել է ՀՀ կառավարության որոշման նախագիծ, որով վերանայվել է համայնքների գլխավոր հատակագծերի և համակցված տարածական պլանավորման փաստաթղթերի տրամաբանական կառուցվածքը՝ կրճատելով փաստաթղթերի համաձայնեցման գործընթացը և պահանջվող ժամանակը, առաջարկելով` փաստաթղթերում փոփոխություններ կատարելու կանոնակարգման մեխանիզմներ, գործընթացում շահագրգիռ մարմինների մասնակցություն, արդյունավետության բարձրացում և այլն:

«Միկրոռեգիոնալ մակարդակի` համակցված տարածական պլանավորման փաստաթղթերի նախագծերի մշակման ծրագրի» իրականացման շրջանակներում Կոմիտեն այսօր համակարգում է ՀՀ Տավուշի մարզի 55 համայնքների տարածքները ներառող 6 համակցված տարածական պլանավորման փաստաթղթերի մշակման գործընթացը: