Այսօր կայացած ՀՀ կառավարության նիստում ՀՀ ԿԱ քաղաքաշինության պետական կոմիտեի նախագահ Նարեկ Սարգսյանը ներկայացրել է «Հայաստանի Հանրապետությունում կառուցապատման նպատակով թույլտվությունների և այլ փաստաթղթերի տրամադրման կարգը հաստատելու և Հայաստանի Հանրապետության կառավարության մի շարք որոշումներ ուժը կորցրած ճանաչելու մասին» N 596-Ն որոշման մեջ լրացումներ և փոփոխություններ կատարելու մասին որոշման նախագիծը, որն արժանացել է կառավարության հավանությանը: Նախագիծը ներկայացնելիս նա նշել է, որ առաջարկվում է գծային ինժեներական ենթակառուցվածքների ստեղծման աշխատանքները դասել նախագծման թույլտվություն կամ ճարտարապետահատակագծային առաջադրանք չպահանջող շինարարական աշխատանքների շարքում և խնդիրը կարգավորել բացառապես հետագիծ-նախագծային փաստաթղթերի համաձայնեցման միջոցով շինարարության թույլտվության տրամադրմամբ՝ առանց ավարտական ակտի ձևակերպման:

Արդյունքում՝ թույլտվությունների համար նախատեսված` 20 օրվա փոխարեն գործողությունը կկատարվի 3 օրում:
  
***
ՀՀ վարչապետ Կարեն Կարապետյանն անդրադարձ է կատարել նաև համատիրությունների գործունեությանը և նշել, որ իրականացված ուսումնասիրությունների և համայնքների հնգամյա զարգացման ծրագրերի հետազոտությունների արդյունքում վերհանվել են մի շարք խնդիրներ բազմաբնակարան բնակարանային ֆոնդի վերաբերյալ, որոնց թվում է համատիրությունների կողմից շենքերի ոչ արդյունավետ կառավարման հարցը, ինչը հանգեցնում է շենքային պայմանների, մասնավորապես,  տանիքների ոչ բարվոք վիճակի վերաբերյալ համաքաղաքացիների բողոքներին: Ստեղծված իրավիճակը, վարչապետի համոզմամբ՝ պայմանավորված է ոչ արդյունավետ կառավարմամբ և օրենսդրական թերի կարգավորումներով: Այս համատեքստում նա հանձնարարել է քաղաքաշինության պետական կոմիտեի նախագահ Նարեկ Սարգսյանին, միաժամանակ, առաջարկելով նաև Երևանի քաղաքապետին 2-ամսյա ժամկետում՝ համատեղ քննարկումների արդյունքում լուծումներ առաջարկել հանրապետության բազմաբնակարան շենքերի կառավարման ոլորտում առկա խնդիրների լուծման վերաբերյալ:

***
Վարչապետն անդրադարձել է նաև Սևանա լճի և հարակից տարածքների սոցիալ-տնտեսական զարգացման խնդիրներին: Ըստ այդմ, նա նշել է. «Սևանա լիճը և հարակից տարածքները ունեն ոչ միայն բնապահպանական և սոցիալական առանցքային նշանակություն, այլ նաև՝ լուրջ տնտեսական ներուժ՝ հատկապես զբոսաշրջության զարգացման տեսանկյունից: Այսօր այդ տարածքները ոչ միշտ են արդյունավետ օգտագործվում»:

Այս առումով ՀՀ ԿԱ քաղաքաշինության պետական կոմիտեի նախագահին հանձնարարվել է 2-ամսյա ժամկետում առաջարկություններ ներկայացնել ՀՀ կառավարության աշխատակազմ՝ «Սևան» ազգային պարկի կենտրոնական գոտում ներդրումային ծրագրերի իրականացման համար՝ հիմք ընդունելով Սևանա լճի կենտրոնական գոտում կառուցապատման համար նախատեսված տարածքների գոտիավորման նախագիծը: