Այսօր ՀՀ կառավարությանն առընթեր քաղաքաշինության պետական կոմիտեի Ալ. Թամանյանի անվան ճարտարապետության ազգային թանգարան-ինստիտուտի «Տրդատ» սրահում բացվել է «Այդ հեռու, մոտիկ միջնադարը...» խորագիրը կրող ցուցահանդեսը, որին ներկա էին Կոմիտեի նախագահի միջազգային կապերի գծով խորհրդական Արմեն Մինասյանը, մշակույթի նախարարի տեղակալ Արև Սամուելյանը, ճարտարապետներ, մշակույթի ոլորտի ներկայացուցիչներ:

Ցուցահանդեսում ներկայացվել են հայկական միջնադարյան ճարտարապետության հուշարձանների լուսանկարներ, մանրակերտեր, արժեքավոր նյութեր։

Ցուցահանդեսի բացմանը ներկաներին ողջունելով և Կոմիտե նախագահի խոսքը փոխանցելով` Արմեն Մինասյանը նշել է, որ ներկա քաղաքական իրավիճակում կարևոր է նման ցուցահանդեսների կազմակերպումը, քանի որ Ադրբեջանի կողմից մշտապես ականատես ենք լինում մեր մշակութային արժեքների յուրացման փորձերին, իսկ նման ցուցահանդեսները թույլ կտան մեր արժեքները ճանաչելի դարձնել աշխարհում:

Թանգարանի տնօրեն Անուշ Տեր-Մինասյանի խոսքով ցուցահանդեսի կազմակերպման հիմնական նպատակն է հասարակությանը ծանոթացնել միջնադարյան ճարտարապետության նմուշների հետ:

Նա նաև նշել է, որ այս ցուցանմուշները ցուցադրվել են աշխարհով մեկ` տարբեր երկրներում, իսկ մեզանում` առաջին անգամ են հասանելի դառնում հայ հասարակությանը:

Հիշեցնենք, որ «Այդ հեռու, մոտիկ միջնադարը...» ցուցահանդեսը այցելուների համար բաց է լինելու մինչ 2017 թ. ապրիլի 30-ը: