Փետրվարի 28-ին ՀՀ Ազգային Ժողովը առաջին ընթերցմամբ քննարկել է «Ճարտարապետական գործունեության մասին» ՀՀ օրենքի նախագծի, «Լիցենզավորման մասին» ՀՀ օրենքում փոփոխություն կատարելու մասին», «Պետական տուրքի մասին» ՀՀ օրենքում փոփոխություն և լրացում կատարելու մասին» օրենսդրական փաթեթը:

«Ճարտարապետական գործունեության մասին» ՀՀ օրենքի նախագծի հիմնական զեկուցող, ՀՀ ԿԱ քաղաքաշինության պետական կոմիտեի նախագահ Նարեկ Սարգսյանը ներկայացնելով նախագծի հիմնական դրույթները, նշել է, որ դրանք համապատասխանում են միջազգային չափանիշներին և արդեն իսկ կիրառություն ունեն եվրոպական երկրներում: Օրենքի մշակումը սկսվել է դեռևս 2008 թվականին, տարբեր պատճառներով  օրակարգից դուրս է եկել, 2014 թվականից մենք այն համարել ենք գերակա ուղղություն, քննարկելով տարբեր հարթակներում:

Նա միաժամանակ ընդգծել է, որ ներկայացված օրենքի նախագիծը  ճարտարապետական ողջ հանրության միասնական տեսակետն է և մշակվել է ՀՀ ԿԱ քաղաքաշինության պետական կոմիտեի (իմա` քաղաքաշինության նախարարության) և ճարտարապետների միության հետ համատեղ:
Ն. Սարգսյանը նշել է, որ օրինագծով փորձ է արվում կարգավորել Հայաստանում ճարտարապետական գործունեությանն առնչվող իրավահարաբերությունները, սահմանել՝ «ՀՀ ճարտարապետների պալատի»՝ որպես մասնագիտական միավորման առանձին տեսակի կազմակերպաիրավական ձևը և դրա գործունեության ընդհանուր հիմունքներն ու առանձնահատկությունները: Սահմանվում է «արտոնագրված ճարտարապետ» հասկացությունը: Ըստ այդմ՝ արտոնագրված ճարտարապետը ֆիզիկական անձ է, ով ստացել է ճարտարապետական բարձրագույն կրթություն և օրենքով սահմանված արտոնագիր, որն իրավունք է տալիս նրան ինքնուրույն իրականացնելու ճարտարապետական մասնագիտական գործունեություն:

Օրենքի նախագծի ընդունումն ուղղված է նպաստելու ճարտարապետական գործունեության մասնագիտական որակի բարձրացմանը, բնագավառում առողջ մրցակցության ստեղծմանը:

Արդյունքում կձևավորվի Հայաստանի ճարտարապետների պալատ ոչ առևտրային, ոչ կառավարչական հաստատություն, որի գործունեությունը կկանոնակարգվի ինքնակարգավորման սկզբունքով: Պալատը կիրականացնի ճարտարապետների արտոնագրման և գրանցման, էթիկայի կանոնների հաստատման և դրանց կատարումը վերահսկող, ուսուցման ծրագրերի մշակման և դասընթացների պատշաճ կազմակերպման և անցկացման, պայմանագրերի օրինակելի ձևերի մշակման, աշխատանքների և ծառայությունների գնահատման մեթոդական ցուցումների և այլ գործառույթներ:

Ն. Սարգսյանը նաև նշել է, որ «Ճարտարապետական գործունեության մասին» ՀՀ օրենքի համաձայն պալատը արտոնագրում է ճարտարապետներին և հենց ինքը պատասխանատվություն կրում նրանց գործունեության համար:

Ավելացնենք որ օրենքի հիմնական նպատակն է ապահովել կառուցապատվող միջավայրի, շենքերի ու շինությունների հարմարավետությունը, անվտանգությունն ու հուսալիությունը, ճարտարապետների իրավունքների և օրինական շահերի պաշտպանությունը, ինչպես նաև՝ քաղաքացու և հասարակության պաշտպանվածությունը ճարտարապետության ոլորտում ոչ արհեստավարժ գործունեության բացասական հետևանքներից:

Ի դեպ, այս օրենքի ընդունումը հետխորհրդային պետություններում կարող է լինել առաջինը, նախադեպ դառնալով նաև մյուս հանրապետությունների համար:

«Ճարտարապետական գործունեության մասին» ՀՀ օրենքի նախագծի վերաբերյալ հիմնական զեկուցողին հարցեր են ուղղել ԱԺ պատգամավորներ Գագիկ Ջահանգիրյանը և Խոսրով Հարությունյանը, որոնց վերաբերյալ Նարեկ Սարգսյանը տվել է հանգամանալի պարզաբանումներ:

Մարտի մեկին երկրորդ ընթերցմամբ քննարկվել է ՀՀ կառավարության ներկայացրած «Ճարտարապետական գործունեության մասին», ՀՀ օրենքի նախագծի, «Լիցենզավորման մասին» ՀՀ օրենքում փոփոխություն կատարելու մասին», «Պետական տուրքի մասին» ՀՀ օրենքում փոփոխություն և լրացում կատարելու մասին» օրենսդրական փաթեթը: