Այսօր ՀՀ ԱԺ տնտեսական հարցերի մշտական հանձնաժողովում առաջին ընթերցմամբ քննարկվել է «Ճարտարապետական գործունեության մասին» ՀՀ օրենքի նախագիծը և ստացել հանձնաժողովի դրական եզրակացությունը:

Օրենքի նախագիծը, որը մշակվել է ՀՀ ԿԱ քաղաքաշինության պետական կոմիտեի և ճարտարապետների միության հետ համատեղ, հանձնաժողովում ներկայացրել է ՀՀ ԿԱ քաղաքաշինության պետական կոմիտեի նախագահ Նարեկ Սարգսյանը:

Ն. Սարգսյանը նշել է, որ օրինագծով փորձ է արվում կարգավորել ՀՀ-ում ճարտարապետական գործունեությանն առնչվող իրավահարաբերությունները, սահմանել՝ «ՀՀ ճարտարապետների պալատի» որպես հասարակական միավորման առանձին տեսակի կազմակերպական-իրավական ձևը և դրա գործունեության ընդհանուր հիմունքներն ու առանձնահատկությունները։

Նա նաև նշել է, որ օրենքում սահմանված՝ «արտոնագրված ճարտարապետ»-ը ֆիզիկական անձ է, որը ստացել է ճարտարապետական բարձրագույն կրթություն և օրենքով սահմանված արտոնագիր: «Ճարտարապետական գործունեության մասին» ՀՀ օրենքի  համաձայն  պալատը արտոնագրում է ճարտարապետներին և պատասխանատվություն կրում նրանց գործունեության համար:

Ավելացնենք նաև, որ օրենքի  հիմնական նպատակն է ապահովել կառուցապատվող միջավայրի, շենքերի ու շինությունների հարմարավետությունը, անվտանգությունն ու հուսալիությունը, ճարտարապետների իրավունքների և օրինական շահերի պաշտպանությունը, ինչպես նաև՝ քաղաքացու և հասարակության պաշտպանվածությունը ճարտարապետության ոլորտում ոչ արհեստավարժ գործունեության բացասական հետևանքներից:

Օրենքի մշակմանը ակտիվորեն մասնակցել են ՀՀ ԿԱ քաղաքաշինության պետական կոմիտեի և ՀՃՄ համատեղ հանձնաժողովի անդամները՝ Մ. Մինասյանը (ՀՃՄ նախագահ), Ռ. Ալավերդյանը, Ս. Քալաշյանը, Բ. Քոչարյանը, Գ. Ազիզյանը, այլք: