Այսօր Ալ. Թամանյանի անվան Ճարտարապետության ազգային թանգարան-ինստիտուտում կայացավ շվեյցարացի ճարատարապետ Ջուլիեն Կիզայի` <<Մենդրիսիոյի ճարտարապետական ակադեմիա՝ բացառիկ հայացք ճարտարապետությանը>> թեմայով դասախոսությունը, որի ժամանակ բանախոսը ապագա ճարտարապետներին ներկայացրեց շվեյցարական ճարտարապետական դպրոցի նոր կոնցեպտները`  պատասխանելով նրանց հետաքրքրող հարցերին:

Դասախոսությունը, որին ներկա էր ՀՀ-ում Շվերցարիայի արտակարգ և լիազոր դեսպան Լուկաս Գասսերը, կազմակերպվել էր Հայաստանի Հանրապետության ԿԱ քաղաքաշինության պետական կոմիտեի, Հայաստանում Շվեյցարիայի դեսպանատան, Ալ.Թամանյանի անվան ճարտարապետության ազգային թանգարան-ինստիտուտի և Ճարտարապետության և Շինարարության Հայաստանի ազգային համալսարանի նախաձեռնությամբ:

Դեսպան Գասսերը ողջունելով ներկաներին նշեց, որ այս հանդիպումը շատ կարևոր դերակատարություն կարող է ունենալ ապագայում հայ և շվեյցարացի ճարտարապետների համագործակցության համար:

Երիտասարդ ճարտարապետ Ջուլիեն Կիզան պարզ ճարտարապետության ջատագովը լինելով ներկայացրեց շվեյցարական ճարտարապետական դպրոցի հիմնադրույթները, նշելով, որ ինքը նախընտրում է կենտրոնանալ այն հիմքերի վրա, որոնք առաջնորդում են ցանկացած նախագիծ դեպի հստակ ուղղություն: 
 
Միջոցառման շրջանակում ՀՀ-ում Շվեյցարիայի արտակարգ և լիազոր դեսպան Լուկաս Գասսերը առանձնազրույց է ունեցել ՀՀ ԿԱ քաղաքաշինության պետական կոմիտեի նախագահ Նարեկ Սարգսյանի հետ: Կողմերը քննարկվել են երկուստեք հետաքրքրություն ներկայացնող հարցեր: