Դեռևս 2014 թվականին ՀՀ քաղաքաշինության նախարարությունը որդեգրել է օբյեկտների՝ տարիներ շարունակ ձգձգվող շինարարական աշխատանքներն առավելագույնը երեք տարում ավարտին հասցնելու քաղաքականությունը:

Այս համատեքստում արդեն 2015 թվականին իրականացվել է կրթական, մարզական, առողջապահական օբյեկտների, մշակութային և վարչական կառույցների հիմնանորոգման, կառուցման, ինչպես նաև ավելի քան 20 տարբեր նշանակության օբյեկտների նախագծային աշխատանքներ: 2016 թվականին նախատեսվում է ավարտին հասցնել շինարարության ընթացքում գտնվող օբյեկտների ընդհանուր թվի մինչև 63%-ը, այն դեպքում՝ երբ 2015-ին այդ թիվը կազմել է մոտ 50%, իսկ 2014-ին` 38%:

Քաղաքաշինության նախարարության պատասխանատուները՝ նախարարը և տեղակալները, պարբերաբար շրջայցեր են կատարում հիմնանարոգվող օբյեկտներում:  Մասնավորաբար, օրեր առաջ այցելելով Երևանի N191 դպրոց, որտեղ կատարվող շինաշխատանքների ժամկետների և որակի մասին ԱԺ-ում հարց էր բարձրացրել պատգամավոր Հեղինե Բիշարյանը, նախարար Սարգսյանը ծանոթացել է կրթօջախում կատարվող շինարարական աշխատանքներին:

Նախարարի այցելությանը հաջորդել է ոլորտի մասնագետների հետ անցկացրած աշխատանքային խորհրդակցությունը, որի ընթացքում նա անդրադարձել է հանրապետության կրթօջախներում իրականացվող աշխատանքներին և առկա խնդիրներին՝ հանձնարարելով համապատասխան ստորաբաժանումներին ՀՀ կառավարության համապատասխան որոշման նախագիծ պատրաստել՝ մի շարք օբյեկտների շինարարությունն  այս տարի ավարտելու վերաբերյալ: