Այսօր ՀՀ քաղաքաշինության նախարարության ճարտարապետության ազգային թանգարան-ինստիտուտում տեղի ունեցավ <<Հոռոմոսի վանքը. արվեստ և պատմություն>> գրքի շնորհանդեսը:

10-րդ դարում Ախուրյան գետի ափին կառուցված եկեղեցին, որ սերտորեն կապված լինելով Անի մայրաքաղաքի հետ հանդիսացել է Բագրատունի թագավորների դամբարանատեղին, գործել է մինչև 20-րդ դարի առաջին տասնամյակը:

Գիրքը կյանքի է կոչվել արվեստաբան Էդդա Վարդանյանի, Կարեն Մաթևոսյանի, Արմեն Ղազարյանի, Սոնա Բալոյանի, Սամվել Կարապետյանի և Ժան-Պիեր Մահեի ջանքերի շնորհիվ և հարուստ տեղեկատվություն է հաղորդում եզակի ճարտարապետական կառույց հանդիսացող վանքի պատմական, մշակութային և հնագիտական արժեքների մասին:

Շնորհանդեսի ընթացքում համահեղինակները բազմակողմանի ու մանրակրկիտ ներկայացրեցին իրենց կատարած ուսումնասիրությունները` վանքի պատմության, ճարտարապետության, արձանագրությունների և այլնի մասին:

Գիրքը հրատարկվել է տարեսկզբին Փարիզում` Բյուզանդիայի պատմության և քաղաքակրթության ուսումնասիրությունների կենտրոնի կողմից և <<Dolores Zohrab Liebmann>> հիմնադրամի ֆինասավորմամբ:

Ի դեպ` եզակի ու ինքնատիպ գրքի մեկ օրինակ հեղինակները նվիրվեցին ճարտարապետության ազգային թանգարան-ինստիտուտի գրադարանին: