Նախօրեին կայացել է ՀՀ քաղաքաշինության նախարարին կից   ինժեներատեխնիկական հանձնաժողովի 2015 թվականի անդրանիկ նիստը, որը վարել է հանձնաժողովի նախագահ, ՀՀ քաղաքաշինության նախարարի տեղակալ Արմեն Ղուլարյանը: Նիստին մասնակցել են հանձնաժողովի անդամների զգալի մասը՝  հայտնի շինարարական կազմակերպությունների ներկայացուցիչներ և ղեկավարներ: Քննարկման օրակարգային հարցն է եղել ՀՀ-ում արտադրվող ամրանների արտադրությունը, դրանց ներկայացվող պահանջները:

<<Շինսերտիֆիկատ>> ՍՊ ընկերության ղեկավար Ալեքսանդր Վարդանյանը ներկայացնելով Հայաստանում մեկ ու կես տարի արտադրվող, սակայն դեռևս կիրառություն չունեցող ամրանները, նշել է, որ դրանք անցել են միջազգային նորմերով հաստատված 7 փորձարկումներից 6-ը և ամբողջությամբ բավարարում են ներկայացված պահանջներին: Նա նաև նշել է, որ ներկայացված ամրանները արդեն իսկ մեծ հետաքրքրություն են առաջացրել շինարարների մոտ, որոնք ցանկանում են այն կիրառել գործնականում:

Ամրանները տեսականորեն ներկայացնելուց հետո կատարվել է լաբորատոր-գործնական փորձարկում:

Նախարարի տեղակալ Արմեն Ղուլարյանը ներկաներին հայտնել է, որ տեսականորեն ծանոթանալով ամրանների բաղադրությանը և գործնականում տեսնելով ամրությունը` հնարավոր է կատարել եզրակացություններ դրանց հետագա շահագործման ու կիրառության ոլորտների վերաբերյալ:

Լաբորատոր փորձարկումներից հետո հարցուպատասխան է ծավալվել  մասնագետների և ամրաններ արտադրող <<Շինսերտիֆիկատ>> ՍՊ ընկերության ներկայացուցիչների միջև: