Այսօր ՀՀ քաղաքաշինության նախարար Նարեկ Սարգսյանն ընդունել է ՀՀ-ում Ճապոնիայի արտակարգ եւ լիազոր դեսպան Էյջի Տագուչիին:
 
Քաղաքաշինության նախարարը  շնորհավորել է նորանշանակ դեսպանին` Հայաստանում դիվանագիտական առաքելություն ստանձնելու կապակցությամբ:

Ներկայացնելով ՀՀ քաղաքաշինության  նախարարության ծրագրային առաջնահերթությունները, նախարար Ն. Սարգսյանն   անդրադարձել է  Հայաստան-Ճապոնիա համագործակցության   հնարավորություններին՝ այդ համատեքստում հատկապես առանձնացնելով երկու երկրների համար կարևորություն ներկայացնող՝ սեյսմակայուն շինարարության ոլորտը, ուր Ճապոնիան նորագույն  տեխնոլոգիաների կիրառմամբ լուրջ հաջողությունների է հասել: <<Ես Հայաստան-Ճապոնիա գործակցության շատ կոնկրետ դաշտ եմ տեսնում, մասնավորաբար, Հայաստանը  հարուստ է ոչ մետաղական հանքանյութերով, բնական քարերի բազմապիսի տեսակներով, հատկապես` շինարարության արտադրանքի համար ջերմամեկուսիչ նյութերով, և ճապոնական տեխնոլոգիաների կիրառմամբ երկուստեք  փոխշահավետ ծրագրեր կարելի է իրականացնել>>, ասել է Ն. Սարգսյանը:
Ճապոնիայի արտակարգ եւ լիազոր դեսպան Էյջի Տագուչին, շնորհակալություն հայտնելով ջերմ ընդունելության համար, քաղաքաշինության բնագավառում գործնական համագործակցության պատրաստակամություն է հայտնել՝ առաջարկելով երկու երկրների համար հետաքրքրություն ներկայացնող ծրագրային փաթեթ պատրաստել:  
Հանդիպման ավարտին վերստին շեշտելով  հայ-ճապոնական երկկողմ հարաբերությունների խորացման ուղղությամբ կատարելիք աշխատանքների կարևորությունը, ՀՀ քաղաքաշինության նախարար Նարեկ Սարգսյանը Ճապոնիայի արտակարգ եւ լիազոր դեսպան Էյջի Տագուչիին նվիրել է <<Եղեռն եղեռնից հետո>> վերնագիրը կրող եռալեզու գիրք-ալբոմը: