Այսօր ՀՀ քաղաքաշինության նախարար Նարեկ Սարգսյանը հանդիպեց հանրապետության շինարարական կազմակերպությունների  ներկայացուցիչներին` քննարկելու շինարարության ոլորտի մի շարք հիմնահարցեր:
Այս հանդիպմանը նախորդել էր դեռևս սեպտեմբերի սկզբին ՀՀ վարչապետ Հովիկ Աբրահամյանի մոտ հանրապետության շինարարական կազմակերպությունների ներկայացուցիչների և համապատասխան գերատեսչությունների  պատասխանատուների  մասնակցությամբ տեղի ունեցած  խորհրդակցությունը, որի ընթացքում վարչապետը ներկայացրել էր կառավարության` բնակարանաշինարարության ուղղությամբ նախատեսվող ծրագրերը:
ՀՀ քաղաքաշինության նախարարի մոտ  տեղի ունեցած խորհրդակցության ընթացքում շինարարության ոլորտի ներկայացուցիչներն անդրադարձան ինչպես երկարաժամկետ հիպոթեքային վարկերի սպասարկման տոկոսավճարների սուբսիդավորմանը, այնպես էլ` շինոլորտի այլ խնդիրների` մասնավորաբար, իրացման ենթակա տարածքներին, ինժեներական ենթակառուցվածքները սպասարկող կառույցների հետ առաջացած բարդություններին, որոնք լրջորեն խոչընդոտում են հանրապետությունում ներդրումային բարենպաստ միջավայր ստեղծելու ուղղությամբ գործադրվող ջանքերը:
Շահագրգիռ քննարկման արդյունքում շինարարական կազմակերպությունների  ներկայացուցիչները վերը նշված հարցերի լուծման, ոլորտի կանոնակարգման համատեքստում տարբերակներ առաջարկեցին, որոնք կուսումնասիրվեն և հանգամանալի կքննարկվեն առաջիկայում: