 (2).jpg)
.jpg)
17.06.2022
Սպարտակ Խաչիկյան՝ Երևանի դեմքը կերտած ևս մեկ տաղանդաշատ ճարտարապետ
Երևանի «դեմքը» կերտած ճարտարապետների հարուստ աստղաբույլի մեջ անհնար է չհիշատակել Սպարտակ Խաչիկյանին: «Ռոսիա» կինոթատրոն, Կարեն Դեմիրճյանի անվան մարզահամերգային համալիր, Երիտասարդական պալատ. մայրաքաղաքի այս և մի շարք այլ տպավորիչ ու ինքնատիպ կառույցներ ստեղծվել են ճարտարապետ ընկերների հետ նրա համահեղինակությամբ: Սպարտակ Խաչիկյանի և գործընկերների ստեղծագործական տպավորիչ ժառանգությունն են կազմում նաև Աբովյան և Սևան քաղաքների գլխավոր հատակագծերը, «Զվարթնոց» օդանավակայանը, Դիլիջանում կինեմատոգրաֆիստների ստեղծագործական տունը և այլն:
1960-1970-ական թվականներին Երևանը ճարտարապետական հետաքրքիր փորձարկումների հարթակ էր, որոնց կիզակետում ճարտարապետների հրաշալի եռյակ էր Արթուր Թարխանյան, Սպարտակ Խաչիկյան, Հրաչյա Պողոսյան: Ընկերների ճարտարապետական փորձարկումները քաղաքի սիրված կառույցները դառնալուց առաջ նաև ոչ միանշանակ ընկալումների տեղիք են տվել: Առավելապես «Ռոսիա» կինոթատրոնը՝ Երևանի ամենամոդեռնիստական կառույցներից մեկը: Այդուհանդերձ, այդ գործերն են հռչակ բերել հեղինակներին և երիտասարդ սերնդի համար դարձել ճարտարապետության գործնական դասագրքեր:
Սպարտակ Խաչիկյանը երկար տարիներ դասավանդել է Ճարտարապետության և շինարարության համալսարանում՝ իր փորձը փոխանցելով ճարտարապետների մի քանի սերնդի։
Այսօր վստահաբար կարելի է փաստել, որ Սպարտակ Խաչիկյանի և ընկերների անունները կապվում են ժամանակակից հայ ճարտարապետության նոր շրջանի հետ:
2022թ. հունիսի 12-ին վարպետը կդառնար 90 տարեկան: