Երևանում անցկացվում է բազմաբնակարան շենքերի էներգախնայողության հիմնախնդրի վերաբերյալ եռօրյա համաժողով, որին մասնակցում են ոլորտի մասնագետները, միջազգային և հասարակական կազմակերպությունների, շահագրգիռ գերատեսչությունների, այդ թվում՝ ՀՀ քաղաքաշինության կոմիտեի ներկայացուցիչները:
     Համաժողովի նպատակն է երկրների միջև լավագույն փորձի փոխանակման միջոցով դիտարկել բնակարանային ֆոնդի էներգաարդյունավետության և էներգախնայողության բարելավման ուղիները, քննարկել ոլորտը կարգավորող օրենսդրական դաշտի բարեփոխումները, ինչպես նաև բացահայտել այս բնագավառում ներդրումների խթանման հնարավոր քայլերը: Էներգաարդյունավետությանն ուղղված միջոցառումների շնորհիվ կրճատելով էներգիայի սպառման ծախսերը՝ բնակիչները կկարողանան տնտեսված գումարն ուղղել շենքի պահպանման աշխատանքներին։
Համաժողովը մեկնարկել է ՀՀ քաղաքաշինության կոմիտեի նախագահի, ՄԱԶԾ հայաստանյան գրասենյակի մշտական ներկայացուցչի, «Հաբիթաթ ֆոր հյումենիթի ինթերնեշնլ» կազմակերպության փոխնախագահի և ԱՄՆ միջազգային զարգացման գործակալության հայաստանյան առաքելության տնօրենի ելույթներով:
     Քաղաքաշինության կոմիտեի նախագահ Արմեն Ղուլարյանը բացման խոսքում ընդգծել է, որ էներգաարդյունավետությանն առնչվող հարցերը խիստ արդիական են Հայաստանի համար. «Բնակարանային ֆոնդի էներգաարդյունավետության բարելավումն այլընտրանք չունի: Կառավարությունը հետևողական ջանքեր է գործադրում՝ էներգախնայողության բարձրացմանն ուղղված իրավական ու նորմատիվատեխնիկական դաշտի բարելավման համար: Առաջիկա տարիներին էներգաարդյունավետության և էներգախնայողության միջոցառումները լինելու են բազմաբնակարան շենքերի պատշաճ պահպանման, շահագործման և արդիականացման հարցերի առանցքում»: Կոմիտեի ղեկավարը կարևորել է դեռևս 2016 թվականին օրենքով ամրագրված պահանջը, որի համաձայն՝ նոր կառուցվող բազմաբնակարան շենքերում պետք է պահպանվեն էներգախնայողության և էներգաարդյունավետության պարտադիր տեխնիկական պահանջները: Անդրադարձ է կատարվել նաև շենքերի անձնագրավորմանն ուղղված օրենսդրական փաթեթի և շենքերի էներգաարդյունավետությանն առնչվող նորմերի մշակմանը, ինչպես նաև անկանխիկ եղանակով սեփականատերերի կատարած վճարումներից պահուստային ֆոնդ ձևավորելու հնարավորությանը:
     ԱՄՆ միջազգային զարգացման գործակալության հայաստանյան առաքելության տնօրեն Ջոն Ալելոն ընդգծել է կլիմայի փոփոխության պայմաններում հուսալի էներգամատակարարում ապահովելու կարևորությունը։ Ըստ նրա՝ էներգաարդյունավետության ծրագրերի բարեհաջող իրականացումը նաև կնպաստի ներմուծվող էներգետիկ աղբյուրներից կախվածության նվազեցմանը։ «Մենք պետք է խրախուսենք էներգախնայողությունը և էներգետիկ անվտանգությունը Հայաստանում: Այս ուղղությամբ ձևավորվել է արդյունավետ համագործակցություն պետության, միջազգային կազմակերպությունների և շահագրգիռ կողմերի միջև»,-նշել է Ջոն Ալելոն՝ հիշատակելով սուբվենցիոն ծրագրերը:
     Համաժողովի առաջին օրը ներկայացվել են «Հաբիթաթ ֆոր Հյումենիթի Արմենիա» հիմնադրամի իրականացրած հայաստանյան փորձի ուսումնասիրության արդյունքները, որոնք վերհանել են էներգաարդյունավետության վերաբերյալ բնակչության ոչ բավարար իրազեկվածությունը, ծրագրում մասնակցություն ունենալու հարցում սեփականատերերի տարակարծությունները և այլ խնդիրներ: Տեսակապի միջոցով այլ երկրներից համաժողովին մասնակցողները քննարկել են էներգաարդյունավետության բարձրացման միջազգային օրինակները: Ցուցադրվել է նաև տեսանյութ՝ Հայաստանի տարբեր բնակավայրերում կյանքի կոչված այն ծրագրերի մասին, որոնց արդյունքում կրճատվել է էներգիայի ծախսը։
     Մասնագիտական քննարկումները շարունակվելու են հաջորդ օրերին։