Երևանի խորհրդանիշ դարձած կառույցներ և ազգային հույզերն արտահայտող հուշարձաններ կերտած ՀՀ ժողովրդական ճարտարապետ Արթուր Արտավազդի Թարխանյանն այսօր կդառնար 90 տարեկան։ Նրա հեղինակած շինությունները մեր երկրի այցեքարտն են նաև մեր օրերում։ Հայաստան ժամանողները երկրի ճարտարապետական ժառանգության հետ ծանոթացումն սկսում են հենց «Զվարթնոց» օդանավակայանից, որի հին մասնաշենքի հեղինակներից է Արթուր Թարխանյանը։
     Մարզահամերգային համալիր, «Ռոսիա» կինոթատրոն, Երիտասարդության պալատ, ԳԱԱ մասնաշենքեր. մայրաքաղաքի ճարտարապետական դեմքը ներկայացնող այս կառույցները միայն մի մասն են այն աշխատանքների, որոնք համահեղինակների հետ նախագծել է Արթուր Թարխանյանը։ Նա սերունդներին է թողել շուրջ 2 տասնյակ հուշարձաններ, որոնցից են Հայոց ցեղասպանության զոհերի հուշահամալիրը, Մարտիրոս Սարյանի հուշարձանն ու Շառլ Ազնավուրի արձանը Գյումրիում:
     «Ադիբուդի», «կուկուրուզ», «բուբլիկ»՝ ժողովրդի շրջանում հայտնի մականուններն իր հեղինակած կառույցներին տվել է հենց ինքը՝ հեղինակը՝ գյումրեցուն բնորոշ հումորով։
Մեծանուն ճարտարապետի կոթողները գեղատես արարչագործություն են՝ մտահղացման խորությամբ և իրագործման վարպետությամբ: Այն, ինչ ստեղծվել է ազգայինը, խորհրդայինն ու համամարդկայինը վարպետորեն համադրող արհեստավարժի մեծ նվիրման արդյունքում, երբեք չի կարող մոռացության գիրկն անցնել:
     Արթուր Թարխանյան ժողովրդական մարդ-ճարտարապետն ու համահեղինակ իր անվանի գործընկերները՝ Սաշուր Քալաշյանը, Հրաչիկ Պողոսյանը, Սպարտակ Խաչիկյանը և շատ ուրիշներ, մեծ ավանդ ունեցան հայկական ժամանակակից ճարտարապետության զարգացման գործում: 20-րդ դարի վերջին և 21-րդ դարի նախաշեմին Արթուր Թարխանյանի կողքին փայլատակեցին տասնյակ նոր աստղեր, որոնք այսօր էլ շարունակում են իրենց ուսուցչի գործը: