 (2).jpg)
.jpg)
08.02.2022
Հայաստանի շինարարների միության նախագահ Գագիկ Գալստյանը դարձավ 70 տարեկան
Հայաստանի շինարարների միության նախագահ, վաստակավոր շինարար Գագիկ Գալստյանն այսօր դարձավ 70 տարեկան: Հիմնադրելով «Հորիզոն 95» շինարարական ընկերությունը՝ նա տասնամյակներ շարունակ ակտիվ գործունեություն է ծավալում քաղաքաշինության բնագավառում՝ հեղինակելով բնակելի, հասարակական և արտադրական նշանակության բազմաթիվ կառույցներ:
Երևանի քաղաքապետարանը, ՀՀ կառավարական 3-րդ շենքը, Ազգային ժողովի նիստերի դահլիճը, Հայաստանի ամերիկյան համալսարանի նոր մասնաշենքը և Ստեփանակերտի օդանավակայանը նրա աշխատանքային հարուստ գործունեության միայն մի մասն են: Նրա գլխավորությամբ են իրականացվել նաև «Մոսկվա» կինոթատրոնի շենքի, Կենտրոնական բանկի հիմնանորոգումը, կառուցվել բարձրակարգ բնակելի շենքեր, բիզնես կենտրոնների բազմաֆունկցիոնալ համալիրներ, դպրոցներ և մանկապարտեզներ:
Գագիկ Շաղաբեգի Գալստյանի աշխատանքային կենսագրության մեջ առանձնահատուկ տեղ են գրավում Մայր Աթոռ Սուրբ Էջմիածնի տարածքում նրա գլխավորությամբ կերտված հոգևոր կառույցները: Այսօր նրա, վերականգնող ճարտարապետների և հետազոտողների ջանքերով ավարտին են մոտենում Մայր Տաճարի վերականգնողական աշխատանքները:
Նրա վաստակը բարձր են գնահատում ոչ միայն մասնագիտական շրջանակում. Գագիկ Գալստյանն արժանացել է պետական, միջազգային և հասարակական կազմակերպությունների շքանշանների, մրցանակների, պատվոգրերի և շնորհակալագրերի:
Վաստակաշատ շինարարը, 2014թ.-2019թթ. լինելով Ճարտարապետության և շինարարության Հայաստանի ազգային համալսարանի ռեկտորը, մեծ ներդրում է ունեցել նաև ոլորտի մայր բուհի կայացման, գիտական և տեխնիկական բազայի կատարելագործման ուղղությամբ:
Անգնահատելի է Գագիկ Գալստյանի ծառայությունը ճարտարապետության և շինարարության բազմահազար հանրության միավորման և բնագավառի զարգացման գործում:
Հայաստանի Հանրապետության քաղաքաշինության կոմիտեն, Ճարտարապետների պալատը, Կառուցապատողների հայկական ասոցիացիան ու Ճարտարապետության և շինարարության Հայաստանի ազգային համալսարանը շնորհավորում են վաստակավոր շինարարին և բարձր գնահատելով նրա ավանդը քաղաքաշինության բնագավառում՝ մաղթում առողջություն և աշխատանքային նորանոր ձեռբերումներ: