2022 թվականի հունվարի 1-ից ուժի մեջ է մտել «ՀՀ կառավարության 2015 թվականի մարտի 19-ի N596-Ն որոշման մեջ լրացումներ և փոփոխություններ կատարելու մասին» ՀՀ կառավարության որոշումը, համաձայն որի Կոտայքի մարզի Նաիրի, Արմավիրի մարզի Վաղարշապատ, Արարատի մարզի Մասիս և Լոռու մարզի Վանաձոր համայնքներում նախագծման և շինարարության թույլտվությունների տրամադրումն իրականացվում է բացառապես էլեկտրոնային եղանակով՝ «e-Permits» միասնական համակարգի միջոցով:
     Բնակչության շրջանում իրազեկման գործընթացը շարունակելու, ինչպես նաև համայնքների քաղաքաշինության բնագավառի պատասխանատուների հետ վերապատրաստման և խորհրդատվության տրամադրման նպատակով, Քաղաքաշինության կոմիտեի ներկայացուցիչների կողմից պարբերաբար այցեր են իրականացվում վերոհիշյալ համայնքներ:
     Ներկայումս Հայաստանի Հանրապետության վերը նշված խոշորացված 4 համայնքների թվով 41 բնակավայրեր օգտվում են կառուցապատման թույլտվությունների տրամադրման էլեկտրոնային «e-Permits» համակարգի ռացիոնալ, արագ և թափանցիկ գործելու, միաժամանակյա համաձայնեցումներ ստանալու հնարավորություններից: