 (2).jpg)
.jpg)
21.04.2021
Շուտով տեղի կունենա ճարտարապետ Հովհաննես Մարգարյանի 120-ամյակին նվիրված ցուցադրությունը
Շուտով տեղի կունենա ճարտարապետ Հովհաննես Մարգարյանի 120-ամյակին նվիրված ցուցադրությունը ՀՀ քաղաքաշինության կոմիտեի Ալ. Թամանյանի անվան ճարտարապետության ազգային թանգարան-ինստիտուտում:
Աշխատանքների մի ստվար հատված առաջին անգամ է ցուցադրվելու այն հանրությանը, ովքեր հետաքրքրված են ճարտարապետության պատմությամբ: Ցուցադրության համար նախատեսված նյութերի զգալի մասը պատկանում է մեծանուն ճարտարապետի ընտանիքին:
Կցուցադրվեն Մարգարյանի ամենահայտնի գործերի ոչ այնքան հայտնի գծագրեր ու աշխատանքներ, ինչպես նաև Կոնյակի գործարանի այն գծագիրը, որի վրա իր հաստատող ստորագրությունն է դրել Անաստաս Միկոյանը:
-Հովհաննես Մարգարյանը խորհրդային շրջանի հայ մեծ ճարտարապետներից մեկն է, և թանգարանի պարտքն է ցույց տալ մեծ ճարտարապետին իր ստեղծագործություններով, որքան հնարավոր է ավելի ծավալուն,- կիսվում է թանգարան-ինստիտուտի տնօրեն Մարկ Գրիգորյանը:
Մարգարյանի նախագծերով Հայաստանում կառուցվել են բազմաթիվ բնակելի, հասարակական և արդյունաբերական շենքեր, որոնք ձևավորում են քաղաքների ճարտարապետական տեսքը։ Նրա շնորհիվ կառուցվեցին Երևանի կոնյակի գործարանը, Ռադիոյի տունը, «Մանկական աշխարհ» հանրախանութը:
Կհրապարակվի ճարտարապետի գործունեությանը նվիրված գիրք՝ ՀՀ քաղաքաշինության կոմիտեի Ալ.Թամանյանի անվան ճարտարապետության ազգային թանգարան-ինստիտուտի հովանու ներքո՝ «Հայ ճարտարապետներ» մատենաշարի շրջանակներում: