ՀՀ քաղաքաշնության կոմիտեի նախագահի 2020 թ. նոյեմբերի 26-ի N 92-Ն հրամանով հաստատվել է «Ճարտարապետների և ճարտարագետ-կոնստրուկտորների արտոնագրման համար որակավորման քննությունների անցկացման կարգը և ճարտարապետների և ճարտարագետ-կոնստրուկտորների որակավորման քննությունների ծրագրերը»։
     Հարկ է նշել, որ վերոնշյալ փաթեթը անցել է մշակման, քննարկումների երկարատև գործընթաց, որում ներգրավված են եղել Հայաստանի ճարտարապետների պալատի, ճարտարապետության և շինարարության Հայաստանի ազգային համալսարանի, մասնագիտական հանրության և քաղաքաշինության կոմիտեի ներկայացուցիչները։
     Վերջնական տարբերակում ներառվել են քննությունների անցկացման կարգը և յուրաքանչյուր մասնագիտական ոլորտին առնչվող ծրագրային հարցաշարերը, որոնցում ամփոփված են տվյալ հավակնորդի աշխատանքային գործունեության իրականացման համար պահանջվող որակավորումն ապահովող մասնագիտական գիտելիքների շրջանակը։
     Համակարգչային կարգավորմամբ իրականացվող գործընթացը լիովին բացառում է մարդկային գործոնը և առավել անկողմնակալ գնահատում հավակնորդի գիտելիքները ինչպես մասնագիտական գործնական պատրաստվածության, այնպես էլ նորմատիվ–իրավական դաշտի իմացության առումով։
     Քննական ծրագրի հարցերի շրջանակին համապատասխան` փաթեթում ներառված է նաև մասնագիտական գրականության ցանկը:
     «Ճարտարապետների և ճարտարագետ-կոնստրուկտորների արտոնագրման համար որակավորման քննությունների անցկացման կարգը և ճարտարապետների, ճարտարագետ-կոնստրուկտորների որակավորման քննությունների ծրագրերը հաստատելու մասին» ՀՀ քաղաքաշինության կոմիտեի նախագահի հրամանին կարող եք ծանոթանալ հետևյալ հղմամբ` https://www.arlis.am/DocumentView.aspx?DocID=148560