ՀՀ-ում շինարարության բնագավառում աճը պահպանելու, ոլորտի շարունակաբար զարգացմանը օժանդակելու նպատակով, թե ինչ նոր գործիքակազմ կարող է պետությունը կիրառել, կորոշվի առաջիկայում՝ գրավոր առաջարկությունների, ծրագրային փաթեթների նախագծերի վերլուծության արդյունքում, որոնք կներկայացվեն ՀՀ քաղաքաշինության կոմիտե Հայաստանի շինարարների միության, շինարարական գործունեություն իրականացնող տասնյակ ընկերությունների կողմից: ՀՀ քաղաքաշինության կոմիտեի նախագահ Վահագն Վերմիշյանի նախաձեռնությամբ, առաջին տեղակալ Արմեն Ղուլարյանի, Հայաստանի շինարարների միության նախագահ, ՀՃՇՊՀ ռեկտոր Գագիկ Գալստյանի, պատասխանատու վարչությունների պետերի ու շինարարական ընկերությունների մասնակցությամբ աշխատանքային քննարկում է տեղի ունեցել: Նրանք խոսել են խնդիրների մասին, առաջարկել օրենսդրական բարեփոխումներ, կատարել իրավիճակի վերլուծություններ և կանխատեսումներ: Քաղաքաշինության կոմիտեի նախագահը նշել է, որ ոլորտում հրամայական որոշումներ չեն կայացվի, և ցանկացած նախաձեռնություն կքննարկվի շինարարության բնագավառի մասնագիտացված հանրության շրջանում: