Շինարարական վրիպումներ թույլ տված, շինարարական էթիկան անտեսած կազմակերպություններն իրենց կատարած աշխատանքներին համապատասխան կգնահատվեն ու կհայտնվեն սև ցուցակում: Այս մասին նախազգուշացրել է ՀՀ քաղաքաշինության կոմիտեի նախագահ Վահագն Վերմիշյանը, և նշել, որ մեծ ուշադրություն է դարձվելու լիցենզավորման գործընթացին:

Փողոցների և հրապարակների հիմնանորոգման գործընթացը պատշաճ կազմակերպելու և թերացումները բացառելու նպատակով ՀՀ քաղաքաշինության կոմիտեի նախագահ Վահագն Վերմիշյանը, Շիրակի մարզպետ Տիգրան Պետրոսյանի, Գյումրիի քաղաքապետ Սամվել Բալասանյանի ու պատասխանատու այլ կառույցների ղեկավարների հետ միասին բաց խորհրդակցության է մասնակցել Շիրակի մարզպետարանում, որին ներկա են եղել ու հարցերին պատասխանել շինարարական կազմակերպությունների ներկայացուցիչները: «Մենք մեր քաղաքն ենք կառուցում, մեր ձեռքով, ուստի այսօր տեղ ունեն միայն ազնիվ շինարարները, ազնիվ նախագծողները: Տանը տեր ունի և համախմբված աշխատանքի արդյունքում, խիստ, անաչառ վերահսկողությամբ, երբ անհրաժեշտ տեղեկատվությունը` ճշգրիտ ու հասանելի կլինի կունենանք մեծ ձեռքբերումներ»,-ասել է Վահագն Վերմիշյանը: Խորհրդակցության ժամանակ վերլուծվել են բոլոր խնդիրները, և տրվել են հստակ հանձնարարականներ: Աշխատանքային խումբ է ձևավորվել, որը կկանոնակարգվի ՀՀ քաղաքաշինության կոմիտեի կողմից: