ՀՀ 2019 թվականի պետական բյուջեով նախատեսված «Փոքրաքանակ երեխաներով համալրված հանրակրթական դպրոցների մոդուլային շենքերի կառուցում» ծրագրի շրջանակներում ՀՀ մարզերի մի շարք համայնքներում նախատեսվել են մոդուլային տիպի թվով 22 միջնակարգ դպրոցների նախագծման և տեղակապման աշխատանքներ:

       Նախագծային աշխատանքների նախապատրաստական փուլում այս օրերին ՀՀ քաղաքաշինության կոմիտեի քաղաքաշինական ծրագրերի իրականացման վարչությունում տեղի  է ունեցել ծրագրով նախատեսված միջոցառումների համատեղ քննարկում՝ ՀՀ Գեղարքունիքի, Տավուշի, Արմավիրի, Լոռու, Սյունիքի, Արագածոտնի, Արարատի մարզպետարանների քաղաքաշինության  և կրթության, մշակույթի և սպորտի վարչությունների պատասխանատու ներկայացուցիչների, համայնքների ղեկավարների և դպրոցների տնօրենների մասնակցությամբ:

   Քննարկումների ընթացքում նախանշվել են առաջնահերթություններ «Փոքրաքանակ երեխաներով համալրված հանրակրթական դպրոցների մոդուլային շենքերի կառուցում» ծրագրով նախատեսված և սահմանամերձ (Տավուշի և Գեղարքունիքի մարզերի) համայնքներում գտնվող դպրոցների կառուցման հրատապության և որոշակի փոփոխությունների անհրաժեշտության մասով:

        Կարևորվել է ծրագրում ընդգրկման համար նախապայման հանդիսացող  չափանիշների սահմանումը, որոնց շրջանակներում առաջարկվել է ճշգրտել առավել կարիքավոր համայնքներում գտնվող դպրոցների ցանկը (համայնքի բնակչության թիվ, հողհատկացման հիմքերի առկայություն, ընդգրկվածություն ՀՀ կառավարության 2015թ. «ՀՀ պետական հանրակրթական դպրոցների սեյսմիկ անվտանգության բարելավման 2015-2030 թվականների ծրագիրը հաստատելու մասին» համապատասխան որոշմամբ հաստատված ցանկում և այլն):

  ՀՀ 2019 թվականի պետական բյուջեում վերաբաշխում կատարելու անհրաժեշտության վերաբերյալ Քաղաքաշինության կոմիտեն դիմել է նաև ՀՀ կրթության և գիտության նախարարությանը, խնդիրների լուծման անհրաժեշտությունից ելնելով կազմակերպվել է համատեղ քննարկում: